Улуустааҕы "Айылгы" норуот айымньытын Дьиэтэ,улуус  нэһилиэктэрин норуот айымньыларын Дьиэлэрин икки ардыларыгар "Айар мастырыскыай" диэн сыл устата араас конкурстары, көрүүлэри ыытар. Ол курдук олунньу ыйга төрөөбүт тыл күнүгэр аналлаах "Мин сахабын", Кыайыы күнүгэр анаан хаартыска, ырыа, үҥкүү, ыһыахха, араас теманан быыстапкалар күрэхтэһиилэригэр биһиги, "Түһүлгэ" норуот айымньытын Дьиэтэ  2021 сыл түмүгүнэн 3 миэстэни ыллыбыт. 1 миэстэни  Болтоҥо, 2 миэстэ Сылан, биһиги Айыллаанныын 3 мисэтэни аҥардастыбыт.  Онон коллегаларбытыгар итии- истиҥ эҕэрдэ.  Нэһилиэкпит, кулууппут аатын ааттаппыт, бары конкурстарга кыттыбыт нэһилиэкпит олохтоохторугар барҕа махтал буолуохтун, куруутун көхтөөх, түмсүүлээх буолуоҕуҥ

Ааспыт нэдиэлэҕэ, "Айылгы" норуот айымньытын  Дьиэтигэр "Үргэл" диэн улуустааҕы үҥкүү түмсүүтэ, улуус  нэһилиэктэрин  үҥкүүһүттэрин   түмэн улахан кэнсиэр оҥордо. Бу түмсүүнү "Айылгы" норуот айымньытын Дьиэтин специалиһа Анна Кузьмина тэрийбитэ, хомойуох иһин кини быйыл улахан аварияҕа түбэһэн биһи кэккэбититтэн туораабыта. Аннабыт кэриэһигэр  ыытыллыбыт улахан түһүлгэҕэ 400 тахса үҥкүүнү таптааччылар, сэҥээрээччилэр кытыннылар. Биһиги нэһилиэкпититтэн 7 кылаас үҥкүүһүттэрэ ыҥырыллан баран транспорт кыайтарбакка кыттыбакка хааллылар. Ол да буоллар оҕолорбутугар "Самодеятельный творческий  коллектив Чурапчинского улуса" диэн сертификат туттардылар.  Инникитин оҕолорбутугар кэрэни кэрэхсээн, обществоҕа туһалаах, дьоһун дьон буола улааталларыгар баҕарабыт.

    Бу ый 7 күнүгэр баһылыкпыт Егор Николаевич, куоракка олорор кытаанахтар түмсүүлэрин салайааччыта Лариса Николаевна тэрийиилэринэн “Алаас ахтылҕана” биир дойдулаахтар көрсүһүүлэрэ  буолан ааста. Тэрээһин сүрдээх былааннаахтык ыытылынна. Ол курдук сарсыарда 10 ч “Россия- моя история” историческай музейга сылдьан, музей сотрудниктарын кытта билсэн, кэпсэтиһэн, инники үлэлэри торумнаһы буолла. Оскуолабыт делегацията, биһиги оскуолабыт выпускнига Василий Михайлович Владимиров директораах, Дьокуускай куорат №2  оскуолатыгар сылдьан опыт атастастылар, уһуйааммыт үлэһиттэрэ 203 мкр баар уһуйаан үлэһиттэрин көрсөн кэпсэтистилэр. Биир ситиһиинэн  А.Е. Кулаковскай аатынан Норуоттар Доҕордоһууларын Дьиэтин (директор А. Корякина) кытта бииргэ үлэлэһиигэ Сөбүлэҥҥэ илии баттаһыыта буолла. Киэһэтин биир дойдулаахтар түмсэн ирэ- хоро кэпсэттилэр. Нэһилиэкпит депутаттара, үгүс көлүөнэ ыччаты көччөх гынан көтүппүт старшай пионербаһаатайбытыгар Розалия Иудовна Коркинаҕа уонна биир дойдулаахпыт “Дорожник” ХЭТ кылаабынай специалиһыгар, биһиги нэһилиэкпит суолун оҥорууга үгүс сылларга үлэлэспит Василий Петрович Захаровка “Кытаанах нэһилиэгин Бочуоттаах олохтооҕо” ааты иҥэрии дохсун ытыс тыаһынан арыалланна.  Розалия Иудовнаны,  пионердара аалай кыһыл хаалтыһы баанан анаан эҕэрдэлээтилэр.

Ааспыт нэдиэлэҕэ улууска ыччаты промышленноска тардарга мунньах ыытылынна. Алдаҥҥа, Нерюнгрига 18 үөһэ саастаах ыччаттары үлэҕэ, үөрэххэ ыҥыралла. Ким интэриэһиргээбит олохтоох дьаһалтаттан ыйыталаһаргытыгар

Кураан саас буолара сабаҕаланар. Эрдэттэн тыа баһаарын утары үлэ ыытыллар. Ол курдук минерализованнай полоса 15м, пожарнай разрыв (нэһилиэк таһынааҕы мастары ыраастааһын) 50м тэйиччи буолар. Бу үлэлэр барыта норуот күүһүнэн, субуотунньугунан ыытыллыахтаахтар.

    Манна даҕатан эттэххэ свалка бүтүннүү астарыллан ырааһырда, онон бөҕу свалкаҕа илдьээччилэр түгэҕэр сүөкүүргүтүгэр. Икки ыйдаах ырааһырдыы биллэриллэр, онон ойбоннору, дьиэ таһын, ыраастык тутаргытыгар.

Ыт боппуруоһа: биирдиилээн ыттар босхо сылдьар түгэннэрэ тахсар. Бу халтараан кэмҥэ оҕоҕо, кырдьаҕаска, саҥа төрүүр кулунчуктарга, сүөһүлэргэ кутталы үөскэппэт гына ыттаргытын баайыыга тутаргытыгар. Хас биирдии хаһаайын иитэр кыылыгар эппиэтинэһи сүгэрин өссө биирдэ санатабыт.

Бэҕэһээ, о.э. муус устар 5 күнүгэр күнүс 11 чаастан тыа хаһаайыстыбатын боппуруостарыгар мунньах буолла. Манна кыттыыны ыллылар улуус баһылыга Степан Анатольевич Саргыдаев, УТХ салаатын салайааччыта А.П.Неустроева, улуус кылаабынай зоотехнига М.Нь. Макарова, улуустааҕы ветеринрия салайааччыта Л.Н.Архипова, "Чурапчы" СХПК салайааччыта Н.А.Аржаков.

Киирии тылы улуус баһылыга Степан Анатольевич эттэ. Быйылгы сайын Тускул этэринэн кураан буолуо диэн сабаҕалыыллар эбит. Кыстыгы этэҥҥэ туораан эрэр курдукпут да муус устар, ыам ыйа сылгыга  кутталлаахтар. Амуртан, Забайкальеттан кэлбит оттор хаачыстыбалара мөлтөх, аны эһиилгэттэн онтон ылымыахха баар эбит оттору. Ол инниттэн оттооһуҥҥа  биирдиилээн улуустары кытта кэпсэтэ сылдьабыт.  Сири таҥастааһыҥҥа, дулҕалары ыраастааһыҥҥа үлэлэр бараллар. Тыа хаһаайыстыбатыгар эбии үп көрөргө депутаттар сесияларыгар туруорсабын. Чэпчэтиилээх бурдуктары, эбиэһи атыылааһыҥҥа тэрээһиннээх үлэлэр барыахтара. 

Тыа хаһаайыстыбатын салаатын салайааччыта А.П.Неустроева

Быйыл улуус бюджетыттан 17 мөл көрүлүннэ. 208 т семенной материал сакастаатыбыт. Дулҕа астарыытыгар улуус 5 мөл көрдө. Федеральнай бюджеттан 127 гаҕа үбү көрдөөбүппүт. Кормопроизводствоҕ техника сыаната ыараан хаалла. Күрүөлээһиҥҥэ 11,5 га 21мөл көрүлүннэ. Күрүөнү дьиҥнээхтии туппут, ороскуоту көрсүбүт  ИП ларга эрэ төлөнөр диэн быһаардыбыт. Семейнэй экономика салгыы үлэлиир сибиинньэ 900, куурусса 6 тыһ, САССР 100 сылынан Чурапчы селотугар олорор элбэх оҕолоох 100 ыалга,  Мындаҕаайыга Павлов Д.Д. сир биэрэн хортуоска олордуохтаах, саҥа көрүҥү куһу, хааһы, эт боруода кууруссалары иитиигэ билигин Төлөйгө сымыыттары аҕаллылар. Быйыл теплица сыаната ыарыы турар буолан аҕалбаппыт, эһиил көрүөхпүт.

"Чурапчы" СХПК салайааччыта Н.А.Аржаков: үүт сыаната 60 солк турар, Улууска эбии 19 ИП тэрилиннэ. Сайылыктааһын 63 солк буолар,25 ыанар ынахтаах буоллаххына, холбоһон да 25 ынах оҥорон 63 солк туттарыаххытын сөп. 

Салгыы боппуруостарга эппиэттээтэ.

Бу күһүн туттарбыт эппит харчыта хаһан төлөнөр? Уопсайа 105 т эти туппуппут ниже среднего, средний диэн хаачыстыбалаах эттэри. Агрохолдинг тэрилтэттэн  займ ылбыппыт,  аҥарын кинилэр төлүүллэр, ол харчыта билигин да кэлэ илик, отыйыгар дылы төлүөхпүт дииллэр.

Арыы харчытыгар ылардаахтар хайдах ылабытый?

Арыы харчытын уу харчынан төлүөхпүт урукку сыананан, правлениены кытта быһаарсан баран быйылгыттан арыынан ылар гына урукку курдук үлэлэһиэхпит диэн этии киллэрээри гынабын. 

Маслоцехха дизель баар буолуо дуо?

Дизель кыра кыамталаах кэлиэҕэ.

Ветеринар баара буоллар?

Ветеринарга үөрэнэр оҕолору кытта кэпсэтэбит, оҕолор хамнаһа кыра, улуус кииниттэн ыраах диэн кытыы нэһилиэктэргэ барыахтарын баҕарбаттар.

Ити курдук  тыа хаһаайыстыбатынан тус дьарыктанар дьоммут  ирэ-хоро кэпсэтэн, мунаарар боппуруостарыгар сөптөөх эппиэти ылан саҥалыы күүһүнэн үлэлииргэ эрэллээх тарҕастылар. 

Республикабытыгар Ийэ, аны күһүн балаҕан ыйын 19 күнүгэр хоту күүс өртүнэн көһөрүллүү 80 сыла туолар. Бу сылларга сөп түбэһиннэрэн "Ийэ сүрэҕэ оҕотугар" диэн ааттаах нэһилиэкпитигэр  сабыс саҥа бэчээттэнэн тахсыбыт кинигэ сүрэхтэниитэ буолла.  

“Сир-дойду аатынан даҕаны, кыраһыабайынан даҕаны аатырбат. Дьонунан-сэргэтинэн, үлэтинэн-хамнаһынан, олоҕунан-дьаһаҕынан аатырар буоллаҕа. Онон, нэһилиэкпитигэр олорон, төрөөн-үөскээн ааспыт дьоммутун үйэтитэн кэпсэл оҥостор буоллахпытына –бу буолар махталбыт бэлиэтэ күндү дьоммутугар, биир дойдулаахтарбытыгар, кинилэр ааттарынан дойдубут сура5ырарыгар. Кинигэ тахсыыта – бу үйэтитии биир көрүҥэ. Көлүөнэттэн көлүөнэҕэ бэриллэн,  сүппэт – оспот  аналланан   ууһуу- тэнийэ  турдаҕа. Ийэ, эбэ, хос эбэ,  биир дойдулаахпыт, хоту күүс өттүнэн көһөрүллүү кыттыылааҕа, Захарова-Пермякова Мария Семеновна туһунан кинигэни суруйда, кыыһа Кытаанах нэһилиэгин Бочуоттаах олохтооҕо, тыа хаһаайыстыбатын Үлэтин бэтэрээнэ Евдокия Прокопьевна Захарова, редакциялаата -кыыһа -Екатерина Прокопьевна Скрябина  СӨ муниципальнай сулууспатын туйгуна, Кытаанах нэһилиэгин Бочуоттаах олохтооҕо, “Бочуот знага” уордьан кавалера Елена Петровна Собакина аатынан олохтоох кыраайы үөрэтэр түмэл общественнай научнай сотруднига, компьютернай версткатын уонна дизайнын оҥордо - Лидия Константиновна Попова, онтон хаартыскалары таҥна – сиэнэ- Евдокия Прокопьевна кыыһа Светлана Николаевна Захарова.

Ийэ сылыгар  "Ийэ сүрэҕэ оҕотугар" кинигэ тахсыбытынан "Кытаанах нэһилиэгэ" МТ баһылыгын эҕэрдэтин туттарда олохтоох дьаһалта дьиэ-кэргэҥҥэ специалиһа Людмила Николаевна Лугинова.

   Көрсүһүүгэ Мария Семеновна оҕолоро, сиэттэрэ, хос сиэттэрэ, кийииттэрэ, чугас билэр, кинини кытта алтыспыт нэһилиэкпит олохтоохторо кэлэн ахтан-санаан аастылар. 

Кинигэ ырытыытын Кытаанахтааҕы тыа сирин модельнай библиотекатын сэбиэдиссэйэ Лена Александровна Пономарева иилээн- саҕалаан ыытта. Кыргыттара Евдокия, Екатерина Прокопьевналар кинигэ хайдах тахсыбытын кэпсээтилэр, улахан эдьиийдэрэ Мария Прокопьевна Захарова, Захаров аймахтар олохторун билиһиннэрдэ.  Сиэттэрэ Анна Прокопьевна, Прокопий Прокопьевич  эбэлэрин туһунан олус истиҥник кэпсээтилэр. Кийиитэ Ольга Романовна, Мария Семеновна хайдах хоту көһөрүллүүгэ айаннаабыттарын, антах Кэбээйигэ тиийэн хайдах үлэлээн, аччыктаан аһыыр баҕаттан хайдах дьон саҥатын тулуйан үлэлээбиттэрин кэпсээн истээччилэри  уйадытта. Анна Михайловна Терютина, Сусанна Васильевна Лазарева Ньээмньээйигэ  дайааркалаабыттарын,  онно мустан бырааһынньыктары тэрийэллэрин, хайдах үлэлээбиттэрин ахтан, оччотооҕу кэмҥэ тиийэ сырыттыбыт. Татьяна Егоровна Пономарева, Мария Семеновна сиэттэрэ, хос сиэттэрэ, эбэлэриттэн удьуордаан, туруу үлэһиттэрин, элбэх интэриэһинэй дьарыктаахтарын  тоһоҕолоон бэлиэтээтэ. 

Түмүккэ- ситим быстыбакка, Мария Семеновна  үһүс көлүөнэ ыччаттара үөрэҕи- билиини өрө тутан, өбүгэлэрин ааттарын үйэтитэ туралларыгар баҕаран кэрэ тыллар этилиннилэр, уопсай хаартыскаҕа түһэн бу түгэни үйэтитиллэр. 

Оҕолоро кинигэни библиотекаҕа бэлэхтээтилэр, онон ким интэриэһиргиир уларсан ааҕаргытыгар.

  Ситимнээх үлэ-сүҥкэн кылаат!

     ХХ үйэ чулуу киһитэ, Саха АССР үтүөлээх учуутала, ССРС, РСФСР, Саха АССР үтүөлээх тириэньэрэ, “Бочуот Знага” уонна “Октябрьскай өрөбөлүүссүйэ” уордьаннар кавалердара, биир дойдулаахпыт  Дмитрий Петрович Коркин аатынан, кини олорбут уһаайбатыгар, Албан аат спортивнай мусуойугар,     биир дойдулаахпыт, Саха АССР үтүөлээх тириэньэрэ, ССРС физкультууратын туйгуна Чурапчы улууһун, Кытаанах, Арыылаах нэһилиэктэрин бочуоттаах олохтооҕо, тыыл бэтэрээнэ  Иван Николаевич Попов туһунан стендэни , кини наҕараадаларын туһунан ахтыы кинигэни, торжественнай быһыыга –майгыга оҕолоро туттаран үйэтиттилэр.     “Оскуола директора Н.Н.Гуляев олус истиҥник аҕабыт туһунан ахтыы оҥордо, музей салайааччыта Пудов Е.В. иһирэхтик санаатын эттэ, улуус үөрэҕириитин спортка салайааччыта Лукин И.П. үйэлэргэ эдэр ыччаттарга холобур буола туруоҕа диэн этиитэ олус истиҥник иһилиннэ, үөрэппит үөрэнээччитэ республика улуус хас да төгүллээх чемпионката , билигин спортивнайй оскуола учуутала Матвеева С.Н. Иван Николаевичка хайдах дьарыктанан үрдүк ситиһиини ылбытын туһунан ахтыы оҥордо”-диэн Иван Николаевич оҕолоро Анна Ивановна Макарова, Дмитрий Иванович Попов уонна кинилэр дьиэ-кэргэттэрэ үөрүүлэрин үллэстэллэр.  Бу курдук суруллубут суоруллубат, ситимнээх үлэ- сүҥкэн кылаат буолан, үлэһит үтүөтэ киһи аата үйэлэргэ үйэтитиллиннэҕэ.

Быйыл Арассыыйа норуоттарын культурнай  нэһилиэстибэлэрин, САССР тэриллибитэ 100, Саха сиригэр Ийэ, улууска Сир ийэ, хоту көһөрүллүү 80 сылыгар аналлаах "Айхаллан, Чурапчы!" улуустааҕы уус- уран самодеятельноһы көрүү фестивала кулун тутар 21 күнүттэн саҕаланан бэҕэһээ о.э. кулун тутар 27 күнүгэр түмүктэннэ.

Сүрүн ирдэбиллэр: 16 номердаах академическэй кэнсиэр, уус-уран оҥоһуктар, нэһилиэк 100 сыллаах историятын көрдөрүү быыстапкалара, көһөрүллүү 80 сылыгар аналлаах "Көһөрүллүү историята биһиги нэһилиэкпитигэр" 10 мүн видеоролик

Биһиги нэһилиэкпит дьоно-сэргэтэ, ыччата түмсэммит бары ирдэниллэр номердары толорон, кэнсиэри туруордубут. Фестиваль кэнсиэрин ыаллыы сытар Сылан нэһилиэгэр баран көрдөрдүбүт, А.А.Сивцев аатынан норуот айымньытын Дьиэтин коллектива (директор С.С.Ноговицын) наһаа үчүгэйдик көрсөн, кулуубун туран биэрбитигэр махтанабыт. Көрөөччүлэр дохсун ытыс тыастарынан хас биирдии нүөмэри өйөөбүттэрэ олус долгутуулаах буолла. 

Бу фестивальбытыгар күүс көмө буолбут дьоммутугар махталбыт улахан. Ол курдук  "Дьөһөгөй" үҥкүү көстүүмнэрин быһан биэрбит Прасковья Монастырева, Ирина Макарова, иистэнньэҥнэрбит Марфа Акимова, Айталина Потапова, Акулина Владимирова, Айталина Пономарева, алтайскай үҥкүүбүт көстүүмнэрин тикпит, биһиэхэ наар көмөлөһөр иистэнньэҥмит Зинаида Семеновна Андреева, ыгым кэмҥэ көстүүмнэрбит материалларын иэс биэрбит биир дойдулаахпыт Анна Кононовна Даниловаҕа истиҥ махталбытын тиэрдэбит. 

Баһылыкпыт Е.Н.Потаповка, оскуола директорыгар В. М. Яковлевка, үлэһиппит А. М. Анемподистовка, суоппардар Л.А.Пономаревка, Р.Г.Парфеновка, В.А.Потаповка  транспорынан хааччыйбыттарыгар улахан махтал. 

Бары кэнсиэргэ, быыстапкаҕа кыттыбыт талба талааннаахтарбытыгар барҕа махтал тылларын аныыбыт. Инникитин даҕаны түмсүүлээх, нэһилиэкпит туһугар биир санаанан салайтаран кыайыы кынаттана туруоҕуҥ.

Кэнсиэр түмүгүнэн Галаҕа киирдилэр "Чурапчы, айхаллан!", "На Мамаевом кургане тишина" хордар, "Алаас" дьахталлар ансамблларын толоруутугар "Оһуордьут" ырыа, Давид Андреев оһуохайа, Л.Монгуш чабырҕаҕа.

Муус устар 27 күнүгэр Саха республикатын күнүгэр А Федотов аатынан МФСК гала кэнсиэргэ киирэбит. Уопсай түмүккэ кыра нэһилиэктэргэ

Бастакы миэстэ - Төлөй нэһилиэгэ

Иккис миэстэ - Кытаанах нэһилиэгэ

Үһүс миэстэ - Арыылаах нэһилиэгэ

Бэҕэһээ, о.э. кулун тутар 18 күнүгэр Чурапчыга "Айылгы" оройуоннааҕы норуот айымньытын Дьиэтигэр Арассыыйа норуоттарын култуурунай нэһилиэстибэлэрин уонна лингвист - учуонай С.А.Новгородов 130 сылынан "Чараас сытыы тыллаах чабырҕахпыт чаҥыйдын" Мария Андреевна Герасимова - Сэҥээрэ бирииһигиэр чабырҕаҕы толорооччулар аһаҕас күөн - күрэстэрэ буолла. Уус-Алдантан, Тааттаттан, Мэҥэ- Хаҥаластан, улууспут нэһилиэктэриттэн барыта 132 киһи кыттыыны ылла. 

Биһиги нэһилиэкпититттэн "Оторой-моторой" бөлөх 8 кылаас үөрэнээччилэрэ уонна 9 кылаас үөрэнээччитэ Сайыына Лазарева, Сусанна Васильевна Лазарева уонна Любовь Николаевна Монгуш кыттыыны ыллылар. 

Оҕолорго биирдиилээн толорууга Сайыына Лазарева биһирэбил бирииһинэн, "Оторой-моторой" бөлөх бэйэтин бөлөҕөр Бастакы Үрдэл үрдүк аатын ыллылар. Оҕолорго Кылаан бирииһи Чакыр орто оскуолатын үөрэнээччитэ олоҥхону, чабырҕаҕы  толорооччу Аня Макарова ылла.

Улахан дьоҥҥо Сусанна Васильевна биһирэбил, Любовь Николаевна Үһүс үрдэл аатын ыллылар. Кылаан бирииһи Мэҥэ- Хаҥалас Майатын чабырҕахсыттара ылыахтарын ыллылар.

Күөн күрэскэ кыттарбытыгар 8 кылаас үөрэнээччилэрин төрөппүттэригэр, олохтоох дьаһалтабытыгар, оскуола суоппара Леонид Пономаревка күүс көмө буолбуккутугар махтанабыт. Инникитин өссө биир түмсүүлээх буолуоҕуҥ! 

Бу дьыл 15 күнүгэр биһиэхэ, Кытаанахха "Күн дьонун мичээрэ" эстраднай - цирковой кэнсиэргэ ыҥырабыт. Көрдөрөр айар бөлөх "Доктор Клоун" представлениеҕа ыҥырар.

Программаҕа: цирковой номердар, көрдөөх фокустар, "Железный человек", эквилибр, жонглердар, дьикти аптаах киһи, көрдөөх- күлүүлээх сценкалар, репризалар, трансформер "Бамблби", "Шоу гигантских мыльных пузырей" уо.д.а. 

Билет сыната 350 солк, оҕо 3 сааһыгар дылы босхо киирэр.

Попкорн 250 солк, сахарнай вата 150 солк, шарик твистинг (араас кыыллары оҥорор анал шарик)-100 солк.

Уһун тохтобул кэнниттэн үөрэ- көтө, күлэн - үөрэн санааны, ис туругу өрө көтөҕө кэлэн сылдьыҥ, дуоһуйа сынньаныҥ.

"Доктор Клоун" цирк барыгытын ыҥырар.

Представление спортзалга ыытыллар. Кулун тутар 15 күнэ,

киэһэ 19 ч 00м

     Билиҥҥи кэмҥэ дойдубут историятыгар, национальнай культуратыгар, фольклоругар, норуот үгэстэригэр уларыйыылар буоллулар. Аныгы үйэҕэ интернет, телевидение курдук информационнай технологиялар үрдүктүк сайдыбыт кэмнэригэр, улахан да дьон, оҕолор даҕаны норуот былыр- былыргыттан илдьэ кэлбит национальнай үгэстэрин, олоҕун - дьаһаҕын, культуратын билиитэ намыһах. Дьэ ол иһин дойдубут Президенэ Владимир Путин Арассыыйа норуоттарын национальнай үгэстэрин, искусствотын, ремеслотун өйүүр, сайыннарар сыаллаах -2022 сылы Арассыыйа норуоттарын культурнай нэһилиэстибэлэрин сылынан биллэрдэ.

Бу кэрэ - бэлиэ сылы биһиги нэһилиэкпитигэр аан бастаан сахалыы таҥастаах киин уулуссанан хааман, чурапчылыы оһуокайдаан, баһылыкпыт Егор Николаевич Потапов, "Түһүлгэ" НАДь салайааччыта Любовь Николаевна Монгуш эҕэрдэ тылларынан үөрүүлээх быһыыга- майгыга астыбыт. 

Бу күн "Түһүлгэ" НАДь иһинэн үлэлиир "Иэйии" коллекционердар түмсүүлэрин чилиэннэрэ Татьяна Григорьевна Потапова, Прасковья Дмитриевна Собакина, Аксинья Светлановна Пономарева быыстапкалара турда. "Уран" түмсүүбүт аптаах илиилэринэн, сүрэхтэрин сылааһынан тикпит араас паннолара быыстапкаҕа турдулар. Библиотекарь Лена Александровна  "Үйэлэр алтыһыылара" кинигэ быыстапката дьон болҕомтотун тарта, ол курдук эдэр чинчийээччи Владислав Владимировтан уларсан, сүүрбэһис үйэлэр саҕаланыыларын саҕанааҕы   илиинэн  латыынны суруллубут хоһооннору, суруктары аҕалан көрдөрөн, кэпсээн ыччат болҕомтотун тарта. 

Кулун тутар 5 күнэ - Сахабыт сиригэр уран тарбахтаах маастардар күннэрэ. Бу күнүнэн "Уран" түмсүүбүтүн эҕэрдэлээн Мандар Уус "Ойуу бичик" кинигэтин туттардыбыт. 

Кэлбит дьоммутун "Лыҥкынастар" 7 кылаас  хомусчуттарын бөлөҕө эҕэрдэлээтэ. салайааччы, аатырбыт хомусчут Лука Турнин төрөппүт сиэнэ Варвара Турнина, оҕолор олус долгуйан, кыһаллан бастакы сүрэхтэниилэрин аастылар. 

Бары бу күҥҥэ кыттыбыт "Алаас" дьахталлар вокальнай ансамблларыгар, эдэр ыччаппытыгар, "Лыҥкынастарга", "Иэйиилэргэ", "Ураннарга" күндү көрөөччүлэрбитигэр махтанабыт.

Чэгиэн доруобуйаны, айымньылаах үлэни, көхтөөх олоҕу баҕарабыт! 

Бүгүҥҥү рубрикабытыгар "Түһүлгэ" НАДь кулун тутардааҕы ый үлэтин, былаанын туһунан билиһиннэриэхпит.

Бу ыйга, дьэ үлэбит аһаҕас тэрээһиннэрин ыытыыта көҥүллэннэ. Ол курдук 50%  сааланы толорон, бары ирдэбили тутуһан дьаһалларбытын ыытабыт. Бу үүммүт ыйга туох үлэлэр, тэрээһиннэр буолалларый?

2022 сыл- Арассыыйаҕа культурнай нэһилиэстибэ сыла. Бу сылга аналлаах - нэһилиэкпитигэр,кулун тутар 5 күнүгэр  Культурнай нэһилиэстибэ сылын аһыллыыта. Манна сахалыы таҥастаах киин уулуссанан хаамыы, билигин үлэлии олорор дьиэбитигэр (Тирга) "Уран" уран тарбахтаахтарбыт түмсүүлэрин оҥоһуктарын "Өбүгэм дуораана", "Иэйии" коллекционердар түмсүүлэрин "Биир үйэ - олох ситимэ" өбүгэлэрбит малларын - салларын, "Үйэлэр алтыһыылара" кинигэ быыстапкалара туруохтара.

Кулун тутар 7-8 күннэригэр Кэрэ аҥардарбытыгар аналлаах "Кэрэ ситим" бырааһынньыктааҕы дьоро киэһэ

Кулун тутар 15 күнүгэр "Күн дьонун мичээрэ" эстраднай- цирковой шоу гастрола кэлиэҕэ.

Кулун тутар 16-17 күннэригэр Чурапчыга "Айылгыга" Саха Автономията тэриллибитэ 100 сылыгар аналлаах уус-иис дьоммут быыстапкаларыгар кыттыахпыт

Кулун тутар 24 күнүгэр "Чурапчы, Айхаллан!" фестивальга кыттаары бэлэмнэнии саҕаланна. 

Дьэ ити курдук, бу саҕаламмыт ыйга культурнай дьаһаллар буолуохтара. Онон нэһилиэкпит олохтоохторугар  ыытыллар дьаһалларга көхтөөхтүк кыттыаххыт диэн эрэл улахан.