Новости

IMG-20170408-WA0031.jpg

22.11.2021

Сэтинньи 22 күнэ - Россияҕа уол оҕо күнэ. Бары уол оҕолорбутун, кэлэр кэнчээри ыччаттарбытын Уол оҕо күнүнэн эҕэрдэлиибит. Нэһилиэкпит "Үйэн" дьахтарын Сэбиэтэ, бүгүн, күнүс 16ч00м "Уол оҕо-Эр бэрдэ барытыгар саталлаах" улахан кылаас уолаттарын күрэхтэһиигэ ыҥырар. Көхтөөхтүк кыттын, кыайыҥ

ЛОГО (1) (1).jpg

22.11.2021

2016 сыллаахха улуус баһылыгын ыйааҕынан сэтинньи ый бастакы өрөбүлэ улууспутугар "Талба талааннар" диэн, норуот айымньыларын Дьиэлэрин иһинэн үлэлиир  куруһуоктар, түмсүүлэр күннэрэ анаммыта. Ол кэмтэн ыла сыл аайы сэтинньи ыйга биһиги "Түһүлгэбит" иһинэн үлэлиир куруһуоктар, түмсүүлэр үлэлэрин, дьарыктарын, ситиһиилэрин, быыстапкаларын, кэнсиэртэрин кулуупка, кэлин куйаар ситиминэн көрдөрөн билиһиннэрэбит. 

Быйыл "Талба талааннарбыт" тэрээһиннэрэ улуус киинигэр, "Айылгы"-га кэнсиэр, быыстапка буолара былааннанар. Биһиги "Түһүлгэ" норуот айымньытын Дьиэтин иһинэн 12 куруһуок, түмсүү үлэлииллэр. Бу туһунан анал биэриини kytanaxklub @инстаграммытыгар таһаарабыт, онно кэпсиэхпит куруһуоктарбыт, түмсүүлэрбит быйылгы 2021 сыллааҕы үлэлэрин, ситиһиилэрин. Биһигинниин бииргэ буолаарын. 

доклад.jpg

21.11.2021

Сэтинньи 20 күнүгэр куйаар ситимин нөҥүө нэһилиэкпитигэр тыа хаһаайыстыбатын күнүн дьоро киэһэтэ буолла. Үгэс быһыытынан, нэһилиэкпит тыатын хаһаайыстыбатын специалиһа Айталина Владимировна Пономарева 2021 сыллааҕы үлэ туһунан  дакылаат  оҥордо. "Кытаанах нэһилиэгэ" МТ олохтоох дьаһалтатын дьиэ - кэргэҥҥэ специалиһа Людмила Николаевна Лугинова тус тыа хаһаайыстыбатынан дьарыктанар бааһынай, чааһынай хаһаайыстыба  үлэһиттэринбырааһынньыгынан эҕэрдэлээтэ. Улууска ветеринарнай сулууспа тэриллибитэ 100 сылынан, нэһилиэкпит ветеран үлэһиттэригэр Анисия Филипповна Барашковаҕа, Дмитрий Михайлович Анемподистовка Эҕэрдэ суруктары, быйыл 25 төбө киирэр хотонун туттубут Кириллин Дмитрий Михайловичка 20 тыһ сууммалаах, 40 төбө киирэр хотонун туттубут Потапов Василий Аверкьевичка 30тыһ суммалаах сертификаттары олохтоох дьаһалта аатыттан туттарда. 2021 сыл 10 ый түмүгүнэн нэһилиэкпитигэр саамай элбэх үүтү туттарбыт Боякинов Владимир Федоровичка "Чурапчы" СХПК 3 тыһ сууммалаах сертификатын туттарда. Быйыл саҥа тэриллибит ИП үлэһиттэригэр "Түһүлгэ" НАДь "Сынньалаҥҥа" күрэх тэрийэн, 5 түһүмэххэ илин - кэлин түсүһэн көхтөөхтүк күрэхтэспит дьоммутугар барҕа махталбытын тиэрдэбит. Күрэх түмүгүнэн "Кыайыыга дьулуурун иһин" эҕэрдэ суругу, бэлэҕи Владимир Боякинов тутта, 3 бириистээх миэстэҕэ таҕыста Марк Суздалов, 2 миэстэ үөрүүтүн биллэ Туяра Борисова уонна "Сынньалаҥҥа" күрэх Муҥутуур кыайыылааҕынан, бары кыттааччылары кэннигэр хаалларан 1 миэстэни ылла Изабелла Окоемова.  Ити курдук күннээҕи түбүктэн быыс булан күрэхтэһэн, астына- дуоһуйа кэпсэтиһэн,  сарсыҥҥы күнү эрэллээхтик көрсөр санаалаах тарҕастыбыт.

007.JPG

17.11.2021

 Саха киһитэ күһүҥҥү түбүктээх үлэлэрэ саҕаланнылар: идэһэ, муҥха, муус ылыыта, от тиэйиитэ. Бу нэдиэлэттэн Сахабыт сирин үрдүнэн үрүҥ илгэни үрүлүтэр, эмис эти дэлэтэр, киэҥ бааһыналарга күөх ньаассын оттору, бурдуктары үүннэрэр, тимир көлө уруулун эрэллээхтик тутар,  хороҕор муостааҕы, сыспай сиэллээҕи дэлэтэр, көрөр - истэр, иитэр, үксэтэр, сайыннарар туруу үлэһит дьоммутугар анаммыт Тыа хаһаайыстыбатын күннэрэ  саҕаланнылар. Биһиги нэһилиэкпитигэр бу бырааһынньык сэтинньи 19-20 күннэригэр куйаар ситиминэн ыытыллар. 

Сэтинньи19 күнүгэр киэһэ 19 ч 

"Көмүс көлөһүн" Кытаанах нэһилиэгин сылгыһыттарын туһунан кэпсиир "Кыһыл көмүс пуонда" анал  таһаарыыта. 

Тыа хаһаайыстыбатын күнүгэр анаммыт  "Туругурда туруоҕуҥ хорсун үлэ киһитин" бырааһынньыктааҕы кэнсиэр

Сэтинньи 20 күнэ. Киэһэ 19ч30м "Үлэнэн - дьоллонон" бырааһынньыктааҕы дьоро киэһэ @инстаграм быһа биэриитигэр

 "2021 сыллааҕы үлэбит " - нэһилиэкпит тыатын хаһаайыстыбатын специалиһын А.В. Пономарева дакылаата

Нэһилиэк баһылыгын эҕэрдэтэ, бастыҥнары наҕараадалааһын

Саҥа ИП аналлаах "Сынньалаҥҥа" конкурс

Кэлэн иһэр Тыа хаһаайыстыбатын күнүнэн эҕэрдэлиибит, бу күннэргэ биһигинниин бииргэ буоларгытыгар ыҥырабыт

IMG-20211115-WA0018.jpg

15.11.2021

"Үрүҥ торуоска" декада чэрчитинэн "Кэрэни кэрэхсиир сүрэхтэр" диэн куйаар ситиминэн улуустааҕы көрүү күрэх икки хайысханан ыытылынна. Ырыа күрэҕин улуустааҕы культура специалиһа М.Е.Борисова, "Айылгы" НАДь творческай отделын сэбиэдиссэйэ Е.Д.Дьячковская састааптаах Дьүүллүүр Сүбэ сыаналаата. Кыайыылааҕынан биһиги "Сыккыс" түмсүүтүн чилиэнэ Сардана Окоемова таҕыста. Хоһоон ааҕыытын улуустааҕы кииннэммит библиотечнай ситим кылаабынай библиограба В.П.Лонгинова, ааҕааччыны кытта үлэлиир отдел үлэһиттэрэ Н.Г.Захарова, М.Н.Захарова сыаналаатылар. Биһиги нэһилиэктэн Милена Пономарева кыттан II миэстэ буолла. Бу кыайыыларынан кыргыттарбытын эҕэрдэлиибит. Инникитин даҕаны олоххо көхтөөх буоларгытыгар, хорсуннук, хорутуулаахтык айанныыргытыгар, санаабыккыт табыллан иһэригэр баҕа санаабытын тиэрдэбит!

20211112_211828.jpg

12.11.2021

Бу күннэргэ нэһилиэкпит олохтоохторо, биир дойдулаахтарбыт араас республикатааҕы, улуустааҕы конкурстарга кыттан ситиһиилэннилэр. Ол курдук  республикатааҕы "Сыл аҕата" конкурс улуустааҕы этабыгар, нэһилиэкпит олохтооҕо, эдэр аҕа Петр Бабиченко "Саамай талааннаах аҕа" анал аат кыайыылааҕынан буолла. 

"Үрүҥ торуоска" ыйынньык чэрчитинэн республикатааҕы көрбөттөр анал библиотекалара ыыппыт "Музыкальная дорожка" ырыа конкурсугар "Авторскай ырыа" анал ааты Сардаана Окоемова ылары ситистэ, кыыспытын үрдүк кыайыытынан эҕэрдэлиибит. 

Бу бүгүн үөрүүлээх сонун кэллэ. Дьокуускайдааҕы "Арчы Дьиэтэ" духуобунай култуура киинэ, Дьокуускай куорат "Уокуруктааҕы норуот айымньытын киинэ" тэрийиилэринэн "Үс саха төрүөҕэр" П.А.Ойуунускай айымньыларынан уус-уран ааҕыыга куйаар ситиминэн ыытыллыбыт күрэххэ "Сыккыс" түмсүүлэр  "Былааһы Сэбиэккэ" хоһоонун ааҕан  1Үрдэл үрдүк аатын ыллылар. Кинилэри бэлэмнээн, күрэххэ кытыннарда Кытаанахтааҕы тыа сирин модельнай библиотекатын сэбиэдиссэйэ Лена Пономарева. "Сыккыстарга" истиҥ эҕэрдэ. 

Инникитин даҕаны нэһилиэкпит олохтоохторо көхтөөхтүк кыттан, талааҥҥытын таһаара, киэҥ эйгэҕэ биллэрэ, сэҥээрдэ туруҥ диэн баҕа санаабытын этэбит.

20211111_101223.jpg

11.11.2021

Бүгүн, о.э. сэтинньи 11 күнүгэр "Айылгы" оройуоннааҕы норуот айымньытын Дьиэтигэр, улуус директордарын Сүбэ мунньаҕа ыытылынна. Мунньаҕы улуус культураҕа салаатын салайааччытын солбуйааччы Айталина Михайловна Смирникова саҥа үлэлии кэлбит норуот айымньыларын Дьиэтин  директордарыгар, специалистарыгар эҕэрдэ суруктары, бэлэхтэри туттарыыттан саҕалаата. Билиҥҥи туругунан норуот айымньыларын Дьиэлэрэ QR-кодунан  көрөөччү саалатын 50% толору көрөөччүлээх кэнсиэртэр, куруһуоктар, түмсүүлэр 15 киһилээх үлэлииллэригэр өрөспүүбүлүкэбит Ил Дарханын ыйааҕа тахсыбытын туһунан иһитиннэрэн, бу ыйаахха олоҕуран үлэлиирбитигэр эттэ. 

М.И. Васильева буолаары турар дьаһалларынан "Талба талааннар" куруһуоктар, түмсүүлэр күннэрэ сэтинньи 23 күнүттэн ахсынньы 1 күнүгэр диэри декада былааннанан ыытылларын иһитиннэрдэ, Чурапчытааҕы П.М. Решетников аатынан народнай театр режиссера И.Бушков ахсынньы 2 күнүгэр "Хомуһун" улуустааҕы уус-уран театральнай коллективтар икки ардыларыгар ыытыллар күрэх балаһыанньатын билиһиннэрдэ. Бу сылга Сылан, Арыылаах нэһилиэктэригэр кулууп Дьиэлэрэ тэриллибит үбүлүөйдээх дьаһалларга былааннарын кэпсээтилэр. Ити курдук ирэ-хоро кэпсэтиһэн, үлэни быһаарсан тарҕастыбыт.

IMG-20211024-WA0051.jpg

10.11.2021

Сахабыт сирин уонна Россия Ийэлэрин күнүгэр аналлаах "Ийэбинээн бииргэ" талба талааннары көрүү күрэҕэр, биһиги нэһилиэктэн эдэр ийэ Саргылана Бабиченко кыргыттарынаан Евалыын, Эллалыын уонна эбэлэрэ Лена Александровналыын "Матренина подружки" үҥкүүнэн кыттан 2 миэстэ буоллулар. Үҥкүүнү Николай Суздалов туруорда, оператордарынан Ирина Гаврильева, Агаша Барашкова үлэлээтилэр. Онон, бүтүн хамаанданан үрдүк ситиһиилэммиккитинэн эҕэрдэлиибит.

Талба талааннар күрэхтэрин Саха Өрөпүүбүлүкэтин үлэҕэ уонна социальнай сайдыыга министерствота, "Кыайыы" социальнай көмө ресурснай киинэ, "Дьокуускай куорат дьахталларын лигата" тэрийиилэринэн ыытылынна.   

Алтынньы 19 күнүгэр республикатааҕы "Палитра фольклора" диэн ааттаах оҕо фестивала ыытыллыбыта. Манна "Түһүлгэ" норуот айымньытын Дьиэтин иһинэн үлэлиир "Оторой - моторой" чабырҕахсыттар бөлөхтөрө "Хантан хааннаах, кимтэн кииннээх Кытаанахтарбытый?" диэн төрүттэрбит тустарынан кэпсиир чабырҕаҕынан кыттан, бэйэлэрин бөлөхтөрүгэр Иккис истиэпэннээх лауреат үрдүк аатын ылбыттара. Оҕолорбутун үрдүк ситиһиигитинэн эҕэрдэлиибит. 

Screenshot_20211103-151922_Collage Maker.jpg

4.11.2021

Убаастабыллаах Кытаанахпыт дьоно-сэргэтэ,биир дойдулаахтарбыт! Эһигини Cомоҕолоһуу күнүнэн итиитик-истиҥник "Түһүлгэ" НАДь коллективын аатыттан эҕэрдэлиибит.Бу бырааһынньык биһиги судаарыстыбабыт, Өрөспүүбүлүкэбит, улууспут историятыгар дойду туһугар сомоҕолоһуу, патриотизм, гражданскай эппиэтинэс холобурунан буолар. Арассыыйаҕа олорор бары омуктары кытары биир сомоҕо буолуу өйдөбүл суолтатын хас биирдии нэһилиэкпит олохтооҕо, ордук эдэр ыччат, өйүгэр-санаатыгар иитэн-такайан таһаарара наада. Дойду ыар кэмнэригэр, Арассыыйа сүтэн-симэлийэн хаалар куттала суоһаабытыгар бар дьон сомоҕолоһон, санаа күүһүн холбоон алдьархайы туоратар суолу бары бииргэ тобулбуттара.Сомоҕолоһуу күнэ - Ийэ сирбит инники кэскилин туһугар үрдүк эппиэтинэс уонна эр санаа холобурунан буолар. Сахабыт сирин туһугар, улууспут, нэһилиэкпит туһугар киэн туттуу, кини инники сайдыытын туһугар биир сомоҕо буолан үлэлиир-хамсыыр - биһигини барыбытын ситимниир, түмэр! 

 

 

IMG-20211027-WA0021.jpg

27.10.2021

Бүгүн, Чурапчы улууһун культуратын үлэһиттэрин күһүҥҥү мунньаҕа онлайн форматынан ыытылынна. Темата: " Траектория развития деятельности сферы культуры в новых условиях". Мунньахха кыттыыны ыллылар СӨ культураҕа уонна духуобунай сайдыыга министерствотыттан В.И.Моисеева, Өрөспүүбүлүкэтээҕи норуот айымньытын Дьиэтин генеральнай директора С.С.Семенов, улуус культураҕа салаатын салайааччыта Д.Д.Попов. Модераторынан үлэлээтэ улуус культураҕа салайааччытын солбуйааччы А.М.Смирникова. Мунньахха А.А.Саввин аатынан  түмэл специалиһа С.Никонова, "Айылгы" НАДь техническэй салаа салайааччыта Г.Лыткин, кииннэмит библиотекаттан М.Н.Кузьмина үлэлэрин опыттарын, үлэ саҥа көрүҥүн кэпсээтилэр. "Культура" нацбырайыак кыайыылаахтара Төлөйдөөҕү библиотека, Мунхалов аатынан хартыына галереята  бырайыактарын кэпсээтилэр. Улуус культуратын ветераннара эдэр специалистары, үлэһиттэри саҥа үлэ сезонунан эҕэрдэлээтилэр.


Карта сайта
На сайте используются файлы cookie. Продолжая использование сайта, вы соглашаетесь на обработку своих
персональных данных. Подробности в - ПОЛИТИКЕ КОНФИДЕНЦИАЛЬНОСТИ