Бүгүн олунньу 21 күнүгэр нэһилиэкпитигэр кэлэн иһэр Аҕа дойдуну көмүскээччилэр күннэрин көрсө "Албан аат - дохсун санаа" диэн ааттаах, нэһилиэкпит Эр дьонугар аналлаах биирдиилээн бастыыр иһин  күрэхтэһии буолла. Күрэхтэһиини нэһилиэкпит олохтоох дьаһалтата, "Түһүлгэ" норуот айымньытын Дьиэтэ тэрийэн ыыттылар. Күрэхтэһии 3 көлүөнэнэн ыытылынна. Ыччат, орто, аҕам көлүөнэҕэ барыта 16 Эр бэртэрэ илин кэлин түһүстүлэр. Күнүс 11 чаастан Тир дьиэтигэр салгын саатынан ытыы, онтон киэһэ АК-47 сааны ыһыы, хомуйуу, ботуруону маҕаһыыҥҥа хомуйуу, дартс быраҕыы, боппуруостарга эппиэтээһин. 

Күрэхтэһии түмүгэ биирдиилээн көрүҥҥэ:

Ыччаттарга

Боппуруоска, ботуруон хомуйуутугар, автомат ыһыытыгар, хомуйуутугар - 1м И.Коркин, В.Яковлев 2м, ытыыга, дартска - 1м В.Яковлев таҕыстылар. Уопсай түмүкккэ - Валерий Яковлев 1м, Иван Коркин 2 м буоллулар.

Орто көлүөнэҕэ:

Боппуруостарга - 3м И. Новгородов, 2м А.Антонов, 1 м А.Дьяконов

Ботуруон хомуйуутугар - 3 м И.Оконешников, 2м А.Антонов, 1м А.Дьяконов

Автомат ыһыытыгар, хомуйуутугар - 3м И.Новгородов, 2м А.Антонов, 1м И.Оконешников

Ытыыга - 3м И.оконешников, 2м А.Дьяконов, 1м А.Антонов

Дартс - 3м А.Дьяконов, 2м И.Оконешников, 1м И.Новгородов

Уопсай түмүккэ 3м Иван Оконешников, 2м Анатолий Антонов, 1м Александр Дьяконов

Ветераннарга

Боппуруостарга 3м И.Максимов, 2м Д.Тролуков, 1м И.Игнатьев

Ботуруон хомуйуутугар 3м В.Дьячковскай, 2м И.Игнатьев, 1м И.Максимов

Автомат ыһыытыгар, хомуйуутугар 3м В.Боякинов, 2м В.Дьячковскай, 1м И.Максимов

Ытыыга 3м И.Максимов, 2м В.Новгородов, 1м И.Игнатьев

Дартс 3м В.Боякинов, 2м И.Максимов, 1м В.Дьячковскай

Уопсай түмүккэ 3м Валентин Дьячковскай, 2м Иван Игнатьев, 1 м Иван Максимов 

"Түһүлгэ" НАДь мини розыгрыш тэрийдэ. Бириистэринэн  Дурда, ботуруоннарга 2 сертификат. 3000 сууммалаах сертификаттары Иван Максимов, Владимир Боякинов ыллылар, онтон Сүрүн бирииһи Дурданы Алексей Николаевич Пономарев тутан үөрүү өрөгөйүн биллэ. 

Олохтоох дьаһалта "Саамай аҕа саастаах кыттааччы" анал бирииһи  Алексей Пономаревка, "Саамай толкуйдаах кыттааччы" анал бириис Дмитрий Тролуковка ананна.

Бу күрэхтэһиини көрө, быыһыгар үөрэтэ сырыттылар оскуолабыт 7-8 кылааһын уолаттара, "куурусса чоппуускатыттын үөрэнэр" дииллэринии уолаттар эһэлэрин, аҕаларын ботуруону хомуйууга, сааны ыһыыга үөрэттилэр, маастар кылаас көрдөрдүлэр. Ол курдук Сайаан Дьяконов автомат сааны 28 сөк ыһан, хомуйан көрдөрдө. 

Бу киэһэ ырыанан- тойугунан эҕэрдэлээтилэр Ангелина Харитонова, "Катюша" үҥкүүнэн 4 кылаас кыргыттара (салайааччы Мария Федорова). 

Бары нэһилиэкпит Эр дьонун Аҕа дойдуну көмүскээччи күнүнэн эҕэрдэлиибит! Чэгиэн доруобуйаны, көхтөөх олоҕу баҕарабыт.

Саха дьонугар олунньу 13 күнэ олус суолталаах, олус дириҥ өйдөбүллээх. Бу күн Төрөөбүт тыл  уонна сурук-бичик  күнэ. 

Биһиги нэһилиэкпитигэр олунньу 14 күнүгэр бу күҥҥэ аналлаах биэчэр буолла. Биэчэрбит бастакы чааһыгар библиотекарь Лена Александровна Сэмэн Новгородов, Чурапчы буойун поэттарын олохторун, үлэлэрин билиһиннэрэр сүрдээх интэриэһинэй, прессаҕа мээнэ суруллубатах чахчылары кэпсээтэ, "Түһүлгэ" НАДь иһинэн үлэлиир куруһуок иитиллээччилэрэ, оскуола музыкаҕа учуутала Ангела Харитонова салайааччылаах "Саһарҕа" бөлөх оҕолоро, улахан дьон хоһоон бөлөхтөрө эҕэрдэ нүөмэрдэри бэлэхтээтилэр. 

Быйыл Улуу Кыайыы 80 сылынан нэһилиэкпит тэрилтэлэрин икки ардыларыгар "Уруй Кыайыыга!" бэстибээл эстафета былааннанан,  биэчэрбит  иккис чааһыгар "Кыайыыга кынаттаабыт хоһооннор"  Чурапчы буойун поэттарын хоһооннорунан тэрилтэлэр икки  ардыларыгар  күрэх ыытылынна. Бары тэрилтэлэр бу сүдү сылга суолта биэрэн кэлэн кыттыннылар. Ол курдук Оскуола 1 , оскуола 2, Олохтоох дьаһалта ЖКХ, тыа хаһ, пенсионердар, "Түһүлгэ"- балыыһа холбоһуктаах хамаандалара хоһоону уобарастаан ааҕыыга күрэхтэстилэр. Дьүүллүүр Сүбэҕэ бэрэссэдээтэлинэн Ольга Аржакова, чилиэннэринэн Анисия Дьяконова, Альбина Лугинова, Анна Терютина үлэлээтилэр.

Түмүккэ Оскуола 2 хамаандата  - 3 миэстэ, Түһүлгэ-балыыһа -2 миэстэ, Оскуола 1 хамаандата - 1 миэстэ таҕыстылар. Олохтоох дьаһалта - ЖКХ - 4 миэстэ, тыа хаһ-пенсионердар - 5 миэстэ буоллулар. Бары тэрилтэлэрин, хамаандаларын чиэһин көмүскээбит  ааҕааччыларга махталбытын тиэрдэбит. 

Биһиги дьоллоох олохпут иһин олохторун толук уурбут биир дойдулаахтарбытын кэриэстээн, маннык тэрээһиннэргэ суолта биэрэн кыттан, Улуу Кыайыы 80 сылын өрө күүрэн көрсүөҕүҥ!

Бүгүн, олунньу 8 күнүгэр, Улуу Кыайыы 80 сылыгар аналлаах бильярдка аһаҕас турнир ыытылынна. Тэрийээччилэринэн "Түһүлгэ" норуот айымньытын Дьиэтин иһинэн үлэлиир Бильярд түмсүүтэ. Бу күрэхтэһиигэ 12 сетканан 20 тахса киһи Амматтан, Тааттаттан, Чурапчы нэһилиэктэриттэн кэлэн кыттыыны ыллылар. Күрэхтэһии спонсордарынан "Кытаанах нэһилиэгэ" тыа сирин түөлбэтин олохтоох дьаһалтата (баһылык Е.Потапов), "Түһүлгэ" норуот айымньытын Дьиэтэ (директор А.Пономарева), Анисия, Александр Дьяконовтар дьиэ кэргэттэрэ, ИП лар Борисов Т.Г, Боякинов В.Ф, Пономарев Л.А.

Күрэхтэһиигэ судьуйанан үлэлээтэ нэһилиэкпит спортинструктора Иван Оконешников. Сарсыарда 10 чаастан саҕаланан киэһэ 22 чааска түмүктэммит күрэхтэһиигэ 4 м - И.Оконешников, Д.Платонов, 3м- "Мохсоҕол" хамаанда А.Никитин, Г.Аянитов, 2м- А.Неустроев, М.Пахомов уонна  Кыайыылааҕынан буоллулар  Таатта Дэбдиргэтиттэн Е.Луковцев, И.Баннов.

Бу күн "Түһүлгэ" НАДь коллектива Күүстээх Дэһээккин аатынан республикатааҕы мас тардыһыытын быһа холбонуутун улахан экраҥҥа холбоон көрдөрдүбүт, эбиэт, киэһэҥҥи аһылык астаан аһаттыбыт. Бары күрэхтэһиигэ кэлбит спортсменнарбытыгар, спонсордарбытыгар махталбытын тиэрдэбит. 

Дорооболоруҥ, убаастабыллыых сурутааччыларбыт!

"Кэпсээ, туох сонун?" рубрикаҕа культура сонуннара.

Бу ааспыт тохсунньу ый бүтэһигэр улууска "Айылгы" оройуоннааҕы норуот айымньытын Дьиэтигэр региональнай "Мунхаловскай ааҕыылар" буоллулар. Бу тэрээһин Афанасий Петрович Мунхалов 90 сааһынан ыытылынна. Мунхалов диэн кимий? Афанасий Петрович Мунхалов РСФСР народнай художнига, РСФСР үтүөлээх художнига, Ойуунускай аатынан бириэмийэ бастакы лауреата, Саха Республикатын Духуобунаһын Академиятын академига, Хоту көһөрүллүү кыттыылааҕа, кыра эрдэҕиттэн тулаайах хаалан оҕо дьиэтинэн сылдьан үөрэммит. Кини биллэр үлэлэринэн "Слушают мир", "Солнце". Бу ааҕыылары көрсө  культура үлэһиттэрэ мууска "Слушают мир"  мурал оҥорон көрүстүлэр. 

Ааҕыы пленарнай чааһын Чурапчы улууһун баһылыгын социальнай боппуруостарга солбуйааччы Мария Кронникова салайан ыытта. Икки күн устата ыытыллыбыт кэмпириэнсийэҕэ барыта 200 чэкэ киһи үс секциянан кытынна. Мунхалов аатынан арт-галереяҕа "Линии вдохновения. Искусство якутской графики" экспозициялар турдулар., уруһуйга маастар - кылаастар, төгүрүк остуоллар ыытылыннылар уонна устудьуоннарга "Перфоманс Мунхалова" сынньалаҥ киэһэтэ тэрилиннэ. 

Биһиги оскуолаттан "Жизненный и творческий путь Мунхалова" секцияҕа Юлия Винокурова лауреат, 3-с секцияҕа "Гений места и территорий" Күннэй Коркина лауреат, Кыыдаана Борисова үһүс миэстэ буоллулар. Оскуолабыт учуутала Евдокия Тимофеевна Миронова кыттан 1 м буолла. 

                                      х     х      х      х 

Олунньу 2 күнүгэр өрөбүлгэ "Зима начинается с Якутии" республикатааҕы фестиваль чэрчитинэн "Северная звезда" диэн Бүтүн Россиятааҕы талааннар конкурстара улууспут үгүс талааннаах оҕолорун түмтэ. Сарсыарда 10 чаастан  киэһэ 20 чааска диэри ырыаҕа, үҥкүүгэ, фольклорга, модаҕа, кэпсэтии жанрыгар конкурс ыытылынна. Биһиги оскуолаттан 4 кылаас "Саһарҕа" бөлөҕө норуот ырыатыгар 1 лауреат, 10 кылаас "Лыҥкынастар" хомусчуттар бөлөхтөрө 2 лауреат (сал А.Харитонова), 7 кылаас үҥкүү бөлөҕө  2 дипломант, 5 кылаас үҥкүү бөлөҕө 2 дипломант (сал А.Суздалова), "Түһүлгэ" норуот айымньытын Дьиэтин иһинэн үлэлиир "Оторой - моторой" чабырҕахсыттар, Сандал Сидоров, Виталий Гоголев ырыалара, чабырҕаҕа 1 лауреат, Алина Нестроева 2 дипломант аатын ыланнар Кубогынан, мэтээллэринэн, дипломнарынан наҕараадаланнылар.  Оҕолорбутун сылаас сымнаҕас массыыналарынан илдьэ сылдьыбыт суоппардарбытыгар Дьулус Барашковка, Василий Лазаревка, Илья Нестеревка, Егор Барашковка, төрөппүттэргэ, кылаас салайааччыларыгар  барҕа махталбытын тиэрдэбит. 

                                     х      х      х      х

Олунньу 26 күнүгэр нэһилиэкпитигэр "Айхаллан, Чурапчы!" фестиваль буолар. Репетициялар саҕаланнылар. Хаһан да буоларын курдук нэһилиэкпит дьоно бары бииргэ түмсэн бу улахан хамсааһыҥҥа кыттыһан нэһилиэкпит аатын ааттатыаҕыҥ. Урукку сылларга бары бииргэ тоҕо түһэн фестивальга Бастакы миэстэлэри ылбыппыт. Быйылгы фестиваль Кыайыы 80, Чурапчы улууһа тэриллибитэ 95, Мунхалов төрөөбүтэ 90, Сэһэн Боло төрөөбүтэ 120 сылларгар анана

Мэҥэ - Хаҥалас улууһун Майатыгар Аркадий Новиков аатынан "Көөчөөн көрө" көр- күлүү  мини театра үлэлиирин көрүдьүөһү, көрү- күлүүнү сөбүлүүр дьон бары билэллэригэр саарбахтаабаппыт. 

Бу театр тэрийиитинэн быйыл "Сааскы сирэйдэр" диэн ааттаах 17-с республикатааҕы көр- күлүү фестивала ыытылынна. Күнүс 13 ч саҕалаан кыттааччылар аҕалбыт нүөмэрдэрин Дьүүллүүр Сүбэҕэ көрдөрдүлэр. Бу иннинэ 1 тур кэтэхтэн ыытыллыбыта, онно үчүгэй нүөмэрдэр талыллан 2 турга киирбиттэрэ. Конкурска Сунтаартан, Ньурбаттан, Бүлүүттэн, Чурапчыттан, Мэҥэ- Хаҥаластан, Уус- Алдантан, Үөһэ- Бүлүүттэн, Хаҥаластан, Намтан, Хатастан  элбэх кыттааччы кэлбит.

Дьүүллүүр Сүбэҕэ бэрэссэдээтэлинэн С.С.Адамова, чилиэннэринэн суруйааччы Куорсуннаах, Валентина Чиркова уо.д. үлэлээтилэр. 

Көрүү түһүмэҕэ киэһэ 17 ч дылы буолла, онтон маастар кылаастар, сүбэ - ама биэрии, нүөмэрдэри ырытыы оҥордулар Дьүүлүүр Сүбэ чилиэттэрэ. 

Биһиги "Түһүлгэ" норуот айымньытын Дьиэтэ 2 номеры ыыппыппыт, нүөмэрдэрбит  1 туру ааһан 2 турга киирэн, аны жюрига  көрдөрдүбүт. 

Биир номербыт Галаҕа киирбитэ.

Киэһэ 19 ч Ходулов аатынан театрга  кыайыылаахтары наҕараадалааһын, Гала - кэнсиэр ыытылынна. Түмүккэ биһиги "Бэт да бэт" бөлөхпүт "Бастыҥ үтүктээйи" диэн анал аат ылла. Хадаартан олохтоох дьаһалта үлэһиттэрэ, баһылыктарыгар тиийэ кэлэн кыттан "Сааскы сирэйдэр" конкурс 1 степеннээх Лауреаттарынан буолан, Аркадий Новиков оҕолоро туруорбут бириистэрин тутан үөрүү өрөгөйүн биллилэр. Манна диэн эттэххэ биһиги былырыын аан бастаан кыттан эмиэ 1 Лауреат аатын ылбыппыт.

Кылаан Чыпчаалы Ньурба Антоновкатын  "Айуу, чэ" бөлөҕө ылла. 

Онтон муус устар 1 күнүгэр кыайыылаахтар "Сааскы сирэйдэр" турга Хаҥаласка гастроллуу бардылар. 

Көрү - күлүүнү өрө тутан, үөрэн- көтөн сылдьыҥ, олоххутун уһатыҥ!

Бүгүн, тохсунньу 23 күнүгэр Кытаанахха улахан суолталаах күн буолла.  Улуу Кыайыы 80 сылын көрсө Кыайыы Кыһыл Знамята  бүтүн өрөспүүбүлүкэтээҕи "Бары бииргэ кыайыыга" диэн девизтээх эстафетата Сэбиэскэй Сойуус бастакы дьоруойа  Федор Кузьмич Попов төрөөбүт дойдутуттан - Мэҥэ - Хаҥалас Баатара нэһилиэгиттэн саҕаламмыта. Бэҕэһээ Уус- Алдан улууһа Знамяны Чурапчы улууһугар туттарбыта, онтон бүгүн Кыайыы Знамятын биһиги нэһилиэкпитигэр көрүстүбүт.

Сарсыарда 10 чааска оскуолабыт спортсаалатыгар байыаннай таҥастаах оҕолор,оскуолабыт үөрэнээччилэрэ, уһуйаан иитиллээччилэрэ, нэһилиэкпит тыыл, үлэ ветераннара, олохтоохтор өрө көтөҕүллэн, долгуйан миуһуннубут. Кыайыы Знамятын тутан киирдилэн оскуолабыт "Барс" байыаннай-патриотическай кулуубун байыастара:

Айсен Терютин - "Барс" байыаннай-патриотическай кулууп хамандыыра, 2024 сыллаахха Тааттаҕа ыытыллыбыт Карбышевскай сбор взводун бастыҥ хамандыыра

Тимур Пономарев - 11 кылаас үөрэнээччитэ, Ил Дархан харыйатын кыттыылааҕа

Виталий Гоголев - улууска "Бастыҥ общественник" номинация кыайыылааҕа

Мичил Пономарев - оскуолабыт "Патриот" эдэр армия патриотическй кулуубун хамандыыра.

Эҕэрдэ тылы  улуус баһылыгын социальнай боппуруостарга солбуйаачччы Мария Кронникова, нэһилиэкпит баһылыга Егор Потапов эттилэр. Биһиги олохпут туһугар охсуспут, тыыннарын толук уурбут саллааттарга сүгүрүйэн, ытыктаан биир мүнүүтэ иһийэн турдубут. Торжественнай линейка парадын Петр Бабиченко күүстээх куолаһынан салайда, түмүккэ  нэһилиэкпит историятыгар хаалар хаартыскаҕа түстүбүт.

Бары нэһилиэкпит олохтоохторугар бу олус суолталаах дьаһалга кыттыыны ылан, нэһилиэкпит түмсүүлээҕин - Аҕа дойду улуу сэриитигэр сылдьыбыт, тыыннарын толук уурбут дьоммутун кэриэстээн кэлбиккитигэр дириҥ махталбытын тиэрдэбит!

                          Ким да умнуллубат, туох да умнуллубат!

   Күндү сурутааччыларбыт, бу сылга "Кэпсээ, туох сонун?" рубрикабытын саҕалыыбыт. Бүгүҥҥү рубрикабытыгар улуус баһылыгын отчуотун туһунан билиһиннэрэбит.

   Бэҕэһээ, о.э. тохсунньу 17 күнүгэр, күнүс 2 чаастан улуус баһылыга С.А.Саргыдаев, ону тэҥэ улуус тэрилтэлэрин салайааччылара  кэлэн улуус баһылыгын 2024 сыллааҕы үлэтин отчуоттаатылар.Мунньахха 72 киһи кэлэн отчуоту иһиттилэр, элбэх ыйытыгы суругунан биэрдилэр. 

Ол курдук:

-Кытаанахтан Чурапчыга киирэр суол өрөмүөнүн туруорустубут. Бу суолу фекалка таһар массыыналар наһаа алдьаталлар, кыра  массыыналарга наһаа эрэйдээх суол буоларын бары билэр буоллахпыт Онуоха эппиэт маннык буолла: ити суолу фекалка таһар тэрилтэ бэйэтин кыаҕынан өрөмүөннүү сатыыр, ол гынан фекалка тэрилтэтэ дорожнайдар биһиги массыыналарбытыгар сөптөөх суолу оҥоруохтаахтар диэн этэллэринэн түмүктэннэ. 

-Республика үрдүнэн суол өрөмүөнүгэр 1 млрд солк көрүллэр эбит, бу суумманы 34 улууска, 4 куорат уокуругар түҥэтиллэр, онон олох кыра үп кэлэр эбит. Быйыл улууска бытархай суол өрөмүөнэ буолар, Чурапчы иһигэр Абалаах суолугар уонна Мырылаҕа Даайа Амматынан Тааттанан айанныыр гына өрөмүөн оҥоһуллар. Чурапчыга Е.Борисов аатынан уулусса толору аспаалланарын эттэ. 

- Быйыл биһиги оскуолабыт интернатыгар өрөмүөн барара былааҥҥа киллэриллибитин ытыс тыаһынан арыаллаатыбыт.

- Быйылгыттан нэһилиэкпитигэр саҥа тутуллубут  маслоцехпыт үлэлиир диэтилэр. 

- 3 тэн үөһэ оҕолоох ыалга, Чурапчы селотугар учаастактары биэрии туһунан кэпсээтилэр. Ааспыт 2024 сылга 33 ыалга учаастак биэрбиттэр, онтон 30 ыал учаастагынан буолбакка 200 тыһ солк уу харчынан ылбыттар, аны 512 ыал учаастак ылара хаалбыт. 2025 сылга СВО ҕа сылдьар ыалга 20 учаастагы биэрээри былаанныллар эбит.

Тыа хаһаайыстыбатын боппуруоһа сытыытык турда:

- Хотон өрөмүөнүгэр, күрүө тутуутугар, сылгы базатын тутууга көмөлөр ИП ларга көрүллэр эбит, чааһынай ыалга көрүллүбэтин эттилэр. 

- Ходуһаны дулҕаттан, талахтан ыраастыырга чааһынайдарга үһүс сылын көмөлөһөн кэлбиттэр. 

-  Сүөһү төбөтүгэр харчы бэриллэр, харчы ылбыт сүөһү аны күһүн идэһэлэммэт, баар буолуохтааҕын тоһоҕолоон эттилэр. 

- Сылгыларга чип эбэһээтилинэй буолла

- 2028 сылга диэри биһиги нэһилиэкпитигэр саҥа котельнай тутуллара инвест программаҕа  да суох эбит. Инвестпрограммаҕа Чыаппара, Мугудай бырайыага, Үрэх Күөрэ котельнайын өрөмүөнэ киирбиттэр. Ааспыт сылга биһиэхэ котельнайга 1 саҥа котел кэлбитэ, бу сылга өссө 1 саҥа котел кэлэрин эттилэр. 

- Балыыһабыт  бу сылга федеральнай үп кэллэҕинэ туттуллуо диэн үөртүлэр.

- Биһиги улууспутугар 62 хоту көһөрүллүү кыттыылаахтара, 35 тыыл, үлэ бэтэрээннэрэ, 2 сэрии огдообото олороллор. Быйыл кыайыы 80 сылынан 2 сэрии огдооботугар 100 тыһ солк, 35 тыыл, үлэ бэтэрээннэригэр 10 тыһ биир бириэмэлээх көмө оҥороллорун эттилэр. 2027 сыллаахха Хоту көһөрүллүү 85 сылынан Хатылы  музейыгар таас музей тутулларын кэпсээтилэр. 

Отчуот түмүгүнэн 2024 сыл улуус баһылыгын үлэтин Сөптөөҕүнэн сыаналаатыбыт

- 

Ахсынньы 31 күнүгэр   нэһилиэкпит олохтоохторо "Түһүлгэбитигэр"  дьоро киэһэҕэ мустан эргэ дьылы атаардыбыт, саҥа дьылы көрүстүбүт.  Бу киэһэни "Тэтим" ВИА ырыаларынан ньиргитэн саҕалаата. Эдэр ыччат оҕолорбут Саина Лазарева, Виталий Гоголев ылбаҕай ырыаларынан эҕэрдэлээтилэр,  "Рейс 20-25" диэн ааттаах шоу программаҕа эдэр ыччат кыргыттарбыт, уолаттарбыт көхтөөхтүк кытыннылар.  Ааспыт 2024 сыл биһиги нэһилиэкпитигэр тыа хаһаайыстыбатыгар, спортка, культураҕа, үөрэхтээһиҥҥэ республикаҕа, улууска үрдүк ситиһиилээх дьоммутун "Нэһилиэк Өрөгөйө" диэн видеоконтенна көрдүбүт. Баһылык Егор Потапов саҥа дьылынан эҕэрдэлээн бастыҥ дьоммутугар грамоталары туттарда. Ол курдук  Николай Федорович Смирниковка"Чурапчы улууһун бочуоттаах бэтэрээнэ" удостоверениены, Владимир Николаевич Монастыревка, Лена Александровна Пономареваҕа нэһилиэк депутаттарын уурааҕынан "Кытаанах нэһилиэгин бочуоттаах олохтооҕо" аат иҥэрилиннэ, 2024 сылга таһаарыылаахтык үлэлээбит Далан аатынан оскуола -сад логопеда Ольга Собакинаҕа,  "Түһүлгэ" НАДь иһинэн үлэлиир бильярдистар түмсүүлэригэр, "Тэтим" ВИА- ҕа 10-нуу л ГСМ, грамота туттарылынна.  

Сыл Өрөгөйө - Сусанна Лазарева.  

Олох-дьаһах коммунальнай хаһаайыстыба бастыҥ үлэһитэ-Михаил Колодезников. 

Культура эйгэтин бастыҥ үлэһитэ - Альбина Лугинова

Бастыҥ спортсмен-Валерий Яковлев

Тыа хаһаайыстыбатын эйгэтигэр - Туяра Борисова

Бастыҥ үөрэнээччи - 11 кылаас үөрэнээччиитэ Тимур Пономарев

Бастыҥ общественник- 11 кылаас үөрэнээччитэ Виталий Гоголев

Оскуола иннинээҕи үөрэхтээһин эйгэтин бастыҥа - Валентина Дьяконова

Үөрэх эйгэтин бастыҥа - Галина Аммосова

Бастыҥ бэтэрээн - Марфа Парфенова

Бастыҥ дьиэ кэргэн- Саргылана, Петр Бабиченколар

Саҥа дьыллааҕы тэҥнэбиллээх оонньууга сүрүүн бирииһи Прасковья Монастырева ылан,  саҥа дьыллааҕы соһуччу үөрүүнү биллэ. 

Улууска "Сыл түмүктэрэ" үөрүүлээх дьаһалга, биһиги нэһилиэкпит "Түһүлгэ" норуот айымньытын Дьиэтин уус-уран салайааччыта Любовь Монгуш "Улууска култуура уонна искусство салаатыгар Бастыҥ" ааты ылла, бэйэбит бөлөхпүтүгэр нэһилиэктэр икки ардыларынааҕы спартакиада түмүгүнэн улууска 2 миэстэни ылары ситистибит (спортинструктор Иван Оконешников)

Күндү нэһилиэкпит олохтоохторо, үүммүт 2025 сылынан, саха халандаарынан Эдьэн Иэйиэхсит сыла кэлбитинэн итиитик - истиҥник эҕэрдэлиибит! 

Кэлбит сыл барыбытыгар Или, Эйэни, Дьолу - соргуну, үтүөнү эрэ аҕаллын! 

Саҥа дьылынан, саҥа дьолунан!

Убаастабыллаах сурутааччыларбыт, Кытаанахпыт нэһилиэгин олохтоохторо, биир дойдулаахтарбыт!

Барыгытын кэлэн иһэр саҥа дьылынан эҕэрдэлиибит!

Этэҥҥэ олордоххо сыл хонук дииллэр. Бу ааһан эрэр сылбыт биһиги нэһилиэкпит дьонугар - сэргэтигэр үөрүүлээх түгэннэри, эмиэ даҕаны ыарахан кэмнэри аҕалан тургутан көрдөҕө. Хас биирдии киһи саҥа дьыл кэлэрин долгуйа,туох эрэ үчүгэйи эрэнэ күүтэр. Ааһан эрэр сылга кэннин хайыһан "мин быйыл тугу ситистим, туохха ыарырҕаттым" диэн толкуйдаан, аныгыскы сылга бу итэҕэстэри туоратарга сананара саарбаҕа суох.

Ахсынньы 9 күнүгэр нэһилиэкпит баһылыгын 2024 сылга үлэтин отчуота буолбута, отчуокка тэрилтэлэр  үлэлэрин истэн мунньах кыттыылаахтара үөрбүттэрин, астыммыттарын эппиттэрэ. Тыа хаһаайыстыбатыгар, үөрэхтээһиҥҥэ, культураҕа, спортка улууска кэккэ ситиһиилэрдэннибит. Ол курдук арыы оҥорор сыах маастара Анна Боякинова минньигэс арыытынан аатырда, Сочига барар путевканы бэлэх тутта, Николай Владимировка, Трофим Борисовка, Николай Потаповка саҥа Беларус трактордары  туттардылар, эдэр ИП Саина Алексеева тыа хаһаайыстыбатын министерствотын Гранын кыайыылааҕынан буолла,  спортка нэһилиэктэр икки ардыларынааҕы спартакиада түмүгүнэн бэйэбит бөлөхпүтүгэр 2 миэстэ буоллубут- спортинструктор Иван Оконешников, үөрэх салаатыгар  оҕолорбут, учууталларбыт  республикаҕа, улууска ыытыллар араас ааҕыыларга, конкурстарга лауреат аатын ыллылар: улуустааҕы предметнэй олимпиадаҕа Арсения Винокурова географияҕа 1 миэстэ- учуутал Татьяна Лазарева, технологияҕа Күннэй Коркина, Саина Барашкова кыайыылаахтарынан буоллулар учуутал Туяра Борисова, "Инникигэ хардыы"" НПК ҕа Күннэй Коркина 1миэстэни ылла учуутал Евдокия Миронова. Сылаҥҥа ыытыллыбыт "Учуутал уонна иитээччи биир кэлим ситим" региональнай конкурска Наталья Игнатьева, Ольга Собакина кыайыылаахтарынан таҕыстылар. Фольклору тарҕатааччы олоҥхоһут Сусанна Лазарева Ил Дархан истипиэндьийээтэ буолла. 

Бу суруллубуттары таһынан итэҕэстэр, кыаллыбатах өрүттэр эмиэ бааллар, ону кэлэр сылга туоратарга дьулуһарбыт наадалааҕын этэн туран баһылыкпыт 2024 сыллааҕы үлэтин сөптөөҕүнэн сыаналаатыбыт. Элбэхтик үчүгэйи кэпсээтэххэ, үчүгэй эрэ өрүт арыаллыы сылдьар диэн этэллэр, онон ситиһиилэрбитин кэпсээтибит. 

Үүнэр сылы көрсөр дьоро киэһэҕэ, ахсынньы 31 күнүгэр "Түһүлгэ" НАДь дьоммутугар саҥа дьыллааҕы тэрээһин бэлэмнии сылдьабыт. Бары кэлэн көхтөөхтүк кыттан, оонньоон - көрүлээн эргэ сылбытын атаарыаҕыҥ диэн ыҥырабыт. Бу киэһэ эһиэхэ анаан сонун эҕэрдэлэр, көрдөөх оонньуулар, ырыа- тойук, сүүйүүлээх саҥа дьыллааҕы  билиэт тэҥнээһинэ күүтэллэр. Розыгрышка сүрүн бириис 30 тыһ уу харчынан Билиэт сыаната 400 солк. Маны таһынан хаһаайыстыбаҕа туттуллар мал - сал барыта эһиэхэ анаан. Билиэттэр онлайн атыыга тахсыбыттара, биллэрии барбыта, ватсабы көрүҥ. 

Тохсунньу 1 күнүгэр нэһилиэкпит эр дьонугар биирдиилээн бастааһыҥҥа бильярдка күрэхтэһии ыытыллыаҕа, сүрүн спонсордар "Кытаанах нэһилиэгэ" тыа сирин түөлбэтин олохтоох дьаһалтата, "Уйгу" маҕаһыын ИП Мотрена Дьячковская, "У Аси" маҕаһыын ИП Саина Алексеева, биир дойдулаахпыт ИП Алексей Ноев, таксист уолбут Илья Нестерев, "Түһүлгэ" НАДь директор Айталина Пономарева. Бары эр дьоммутугар  саҥа сылга саҥа кыайыылары баҕарабыт.

Тохсунньу 2 күнүгэр киэһэ 20 чаастан 90-с-2000 сыллар дискотекаларыгар ыҥырабыт. Оччотооҕу кэми санатан таҥнан- симэнэн кэлэн, эдэр саас уохтаах кэмнэрин санаан оонньоон - көрүлээн 30+.

Тохсунньу 3 күнүгэр "Нонстоп" киинэлэргэ ыҥырабыт.

Тохсунньу 5 күнүгэр кырачааннары саҥа дьыллааҕы утренникка ыҥырабыт,  оҕолорбутун соһуччу үөрүү күүтэр. Онтон киэһэ 19 чаастан "Саҥа сылы ырыанан айхаллыы" Светлана Колесова - Сатабыл (кини Анна Барашкова балта), олус күүстээх куоластаах Алаҕартан төрүттээх Рустам Слепцов, ыытааччы Екатерина Рыкунова

Тохсунньу 7 күнүгэр ыччаттарбытыгар Ороһооспотооҕу дискотека

Дьэ бу курдук тэрээһиннэргэ бары  бииргэ буолан, эһиэхэ анаммыт дьоро киэһэлэргэ кэлэргитин долгуйа күүтэбит. 

Сибээскэ нэһилиэкпит баһылыга Егор Николаевич...

Күн бүгүн "Кытаанах нэһилиэгэ" тыа сирин түөлбэтин баһылыга Егор Николаевич Потапов, бойобуой дьайыы бэтэрээнэ Альберт Собакин суһал байыаннай дьайыыга сылдьар уолаттарбытыгар нэһилиэнньэ бүтүннүү атаҕар туран, ас- үөл хомуйбуттарын, бэлэмнээбиттэрин илдьэ Украина сиригэр - уотугар сылдьаллар. Ол курдук бэҕэһээ Мариуполь тулатыгар баар уолаттары көрсөн, госпитальга сытар Кытаанахха үөрэммит, оскуоланы бүтэрбит уолбут А уонна ыаллыы сытар Арыылаах нэһилиэгин күтүөтүн, ону таһынан уоппускаттан ааһан иһэр, биһиги нэһилиэккэ бырааһынан таһаарыылаахтык үлэлээбит А. көрсөн саха быһаҕын, кэһиилэрин, оҕолор суруктарын, открыткаларын, нэһилиэк харысхалын туттардылар. 

Виноградное бөһүөлэккэ Хатылы уолун көрсөн бэйэтигэр анал уонна Чурапчы улууһуттан кэлбит посылкалары туттарбыттар. Бу бөһүөлэк олох Азовскай муора кытылыгар турар эбит, онно киирэн саха дьоно улахан эбэҕэ сүгүрүйэллэрин туомун тутуһан, аһатан, алаадьылаан уолаттарбыт кыайыы аргыстанан этэҥҥэ эргиллэн кэлэллэригэр көрдөстүлэр. Аатырбыт герой Алеша танковай полкатыгар сылдьан экипаһы көрүсүбүттэр. Дириҥтэн сылдьар П уол, ону таһынан танковай полкаттан штурмовик эмиэ Дириҥтэн сылдьар О, кэһиилэрин туттарбыттар. Уолаттар махталларын улууспут салалтатыгар, нэһилиэкпит аҕа баһылыгар, бары олохтоохторго тиэрдибиттэр. Үтүө санаалаах Степан Анатольевичка улууспут салалтатыгар бу айаны тэрийбитигэр, баһылыкпыт Егор Николаевичка,булан - талан, нэһилиэктэн саҕалаан дьонун - сэргэтин түмэн, мунньан эр санаалаах уолаттарбытыгар- оҕолорбутугар этэҥҥэ тиийэн, барыларын көрсөн кэллиннэр диэн барҕа махталлаах, алгыс санаалаах бүгүҥҥү сонуну түмүктүүбүт.