1956 сыллаахха Чурапчытааҕы педучилищены бүтэрбитим. Ол кэмҥэ 1950 cыллартан трахома диэн сыстыганнаах ыарыы өрө тура сылдьар этэ. Ол иһин солдакка да уолаттары ылбаттар этэ, оройуон таһыгар кими да таһаарбаттар этэ. Ол иһин ханна барарбыный дии саныы сырыттахпына, оччолорго райкомол путевка биэрэр этэ, Онон райкомол секретарыгар Дина Дмитриевна Дьячковскаяҕа уочаракка суруйтаран, киниэхэ киирдибит. Онно миигин Кытаанаххын дии, онно саҥа сельскэй кулууп аһыллар, онно үлэлии бар үөрэхтээх киһи диэбитэ. Онон 1956-1957 cылларга саҥа аһыллыбыт сельскэй кулуупка сэбиэдиссэйинэн үлэбин саҕалаабытым. Саамай күүстээх үлэни 1957 cыллаахха ыыппыппыт. Онно  Бүтүн аан дойдутааҕы ыччат фестивала диэн тэриллибитэ. Ол фестивальга оройуон нэһилиэктэригэр кэнсиэр, пьеса, спортивнай нүөмэри толорорго сорудах биэрбиттэрэ, программа оҥорон туттарбыттара. Дьэ онно нэһилиэкпит ыччаттарын, кырдьаҕастарын хомуйан репетиция, бэлэмнэнии буолбуппут. Оччолорго "Маленков" колхоз диэн Кытаанахха соҕотох колхоз баара. Сир аайы кыһыҥҥы кыстыыр фермалардаах, ол фермалары атынан кэрийэ сылдьан талааннаах дьоннору кэпсэтиһэрим. Ырыаһыт, үҥкүүһүт, пьесаҕа оонньуур, олоҥхоһут, уһанар дьоннору ыҥыран, оччолорго кулууп дьиэтэ суоҕа, оскуола кылгас коридоругар, эбэтэр колхоз кэнсэлээрийэтин мунньахтыыр хосторугар репетиция ыытарбыт. Саас, кулун тутарга быһылаах этэ, колхоз икки ЗИС массыыналааҕыттан биирин биһиэхэ колхоз председателэ биэрэн, Захаров Григорий Михайлович суоппардаан фермалары кэрийэн кэнсиэрдиирбит. Өссө оройуон нэһилиэктэрэ Кытаанахтар баһаалыста биһиэхэ кэлэн кэнсиэрдээн диэн ыҥыраннар, онно фестиваль иннинэ кэнсиэрдиир этибит. Оччолорго биһиэхэ талааннаах ырыаһыт, олоҥхоһут ыччат баар аҕай этэ. Холобур Седалищева Анна Николаевна диэн Одьулуунтан төрүттээх, начальнай оскуола учуутала оройуоҥҥа ыллаан, онтон

республикаҕа баран ыллаан биһирэнэн, Москваҕа тиийэ баран ыллаабыта. Ыстапаан Мөрүөнэп диэн олоҥхоһут уол баара, соҕуруу Ньууруга от тиэйээччи, кинини нэдиэлэҕэ иккитэ кэлэн бэлэмнэн диэн ыҥырарбыт. Бу фестивальга ыччаттар араас омук үҥкүүтүн, ырыатын толорон, Потапов Николай Васильевич илиитинэн кыһан оҥорбут сувенира жюри биһирэбилин ылан, оҥоһуга Москваҕа быыстапкаҕа барбыта да төннүбэтэҕэ.