Армия кэнниттэн райпо тутуутугар плотнигынан, спорт "Урожай" общество инструкторынан, Мугудайга "Калинин" аатынан колхозка инструкторынан, комсомол секретарынан уонна Мугудай орто оскуолатыгар физкультура учууталынан үлэлээн баран, "дойдулаах киһи дойдубун булууһукпун" диэн 1969 сыллаахха Кытаанах орто оскуолатыгар интернакка воспитателинэн ананан үлэҕэ киирбитим. Кэлээт да интернат оҕолорун кытта билсиһэн, кинилэр тугунан интэриһиргииллэрин өйдөөн, оччолорго бары бэйэлэрин интэриэстэрин баһылыахтарын баҕарбыт оҕолор этилэр.

Холобур Мохначевскай Володя курдук ис- иһиттэн талааннаах, оччолорго гитара диэн олус аҕыйах бириэмэтигэр, бэйэтэ хатыҥ маһынан гитара оҥостон, ансамбль тэриммит киһи аҕыйах буолуо.

Мин интернакка, остолобуойга куоракка мал - сал ыла киирэ сылдьан, үс гитараны булан таһааран биэрбитим. Дьэ онтукаларынан оонньоон интернат иһэ гитара тыаһынан туола түспүтүн өйдүүбүн. Оччолорго бары сиппит - хоппут уолаттар этилэр. Дагданча Гриша, Андреев Вася, Яковлев Миша курдук төһө да интернакка олорботоллор, танцыга баһылаан - көһүлээн сылдьар уолаттар этилэр. Онтон ыла Килэҥки кулуубар гитара тыаһа тохтообот этэ. Гитараҕа оонньуур эдэр ыччаттар тахсыталаан испиттэрэ.

Бырааттыы Владмировтар тэрээһиннэринэн, этиилэринэн куораттан араас сыаналаах гитаралары, ударнай установкалары, улахан кыамталаах усилителлэри, микрофоннары аҕалар этим. кулуупка 1971 сыллаахха Платон Петрович Седалищев көрдөһүүтүнэн, туруорсуутунан. Чурапчы оройуонун культуратын начальнига Кандинскай Иван Иванович прикаһынан, миигин кулуупка директорынан аныыллар. Онтон ыла 30 тан тахса сыл тохтообокко кулууппар күүһүм баарынан үлэлээн кэллим. Миигин кытта элбэх эдэр ыччат, араас идэлээх үлэһиттэр үлэлээбиттэрэ. Араас хабааннаах дьаһаллар, биэчэрдэр гитарата, ВИА та суох барбат этилэр. Ыччаттар бэйэлэрэ тэриммит бөлөхтөрүнэн харса суох фестивалларга оонньууллара. Кэлин Федор Гоголев, Пантелеймон Винокуров, Геннадий Монгуш курдук үөрэхтээх уолаттар кэлэннэр, биһиги ВИАларбыт оройуоҥҥа биллэр буолбуттара. Төһө да бириэмэ ааспытын иһин гитарист уолаттарбар, кыргыттарбар махталым улахан. Эһиги миэхэ көмөлөһөн культура үтүөлээх үлэһитэ оҥорбуккутун умнуом суоҕа