Биһиги 1974 сыллаахха Кытаанах орто оскуолатын бүтэрбиппит. Кылааспыт уолаттара аан бастакынан оройуоҥҥа Платон Седалищев тэрийбит духовой оркетрыгар оонньууллар этэ. Коркин Коля, Коркин Илья, Миронов Вася. Кэлин 9-10 кылаастарга Колялаах Илья гитараҕа оонньуурга үөрэммиттэрэ. Оскуоланы бүтэрэн баран "Оскуола - производство- үөрэх" диэн оччотооҕу ирдэбилинэн Субуруускай аатынан совхоз Килэҥкитээҕи отделениетыгар фермаҕа үлэлии тахсыбыппыт. Кулууп директорынан ССРС культуратын туйгуна, кынаттаах хайыһардьыт Николай Васильевич Захаов үлэлиир этэ. Кини ыччаттары түмэн ВИА тэрийбитэ. Мин өйдүүрбүнэн онно биһиги уолаттарбыт Коркин Николай (КАН), Коркин Илья, Захаров Николай (Михай) оонньоон саҕалаабыттара. Концертарга, гастролларга танцыга оонньууллар этэ. Николай Васильевич инструменнары сүүрэн - көтөн куораттан атыылаһан аҕалбыта. Мин оччолорго туох баар концертарга, гастролларга, фестивалларга конферанс быһыытынан сылдьааччыбын, ол иһин бары бииргэ гастролларга сылдьааччыбыт. Гастроллуу барарбытын наһаа күүтэр этибит. Онно грузовой массыынаҕа туох баар көстүүмнэрбитин, инструменнарбытын, бензиммитин барытын тиэнэн айан бөҕөнү айаннаан, кыһыҥҥы тымныыларга сырыы бөҕө буолар этибит. Ону билигин наһаа үчүгэйдик саныыбын.